Grut tal keunstners docht mei oan Keunstrûte
Wommels, Freed 07 Maaie 2010, 13:23 oereWommels- Op 12 juni oansteande wurdt yn ús gemeente de Keunstrûte Littenseradiel 2010 hâlden, een Iepen Atelier en Keunstrûte, ferspraat oer de hiele gemeente. Keunstners út de gemeente krije dy dei de kans om harren keunstwurken oan it publyk sjen te litten en der wurde workshops en demonstraasjes organisearre. Der dogge 48 keunstners út de hiele gemeente Littenseradiel mei oan de Keunstrûte, in oantal dêr’t de organisaasje tige wiis mei is.
De organisaasje fan de Keunstrûte is hiel tefreden mei de ynteresse foar it evenemint. It doel fan de iepen-atelier- en keunstrûte is de keunst en foarmjouwing fan de keunstners yn Littenseradiel oan in breed publyk sjen te litten. Op tiisdeitejûn 11 maaie wurdt der foar de dielnimmende keunstners in ynformaasjejûn organisearre op it gemeentehûs.
Der is in affysje makke dêr’t op stiet hokker keunstners mei dogge oan de Keunstrûte Littenseradiel en wêr’t se te finen binne. Dizze affysjes sille fan healwei maaie ôf by de VVV-folderposten, kafee’s en gruttere campings fan Littenseradiel te finen wêze. Ynteressearden kinne ek in affysje ophelje op it gemeentehûs.
Yn hûs-oan-hûsblêd Op ‘e Skille fan tongersdei 10 juny sil ien fan de gemeentlike siden folslein yn it teken stean fan de Keunstrûte mei in oersjoch fan alle dielnimmende keunstners en harren lokaasjes, aktiviteiten, workshops ensafuorthinne. Op sneon 12 juny sille alle dielnimmende ateliers te finen wêze oan ‘e hân fan it logo fan de Keunstrûte en pylken dy’t it paad wize.
Op www.littenseradiel.nl/keunstrute stiet mear ynformaasje oer it projekt, ynklusyf in oersjoch fan de dielnimmende keunstners. Foar fragen oer de organisaasje fan de Keunstrûte kin men e-maile nei keunstrute@littenseradiel.nl.
| In bydrage fan: Jaring Rispens | Diel dit artikel: |
 |
.jpg?website=implementatie&width=82&height=63&func=min&image=4787099ac39c.jpg)
